laugardagur, mars 06, 2004  

NEI NÚ ER ÉG ALVEG BIT! DRAUMUR MINN HEFUR RÆST!

Ísland hefur tekið upp stjórnmálasamband við Nárú. Þið getið lesið um það hér. Mikið er ég glöð. Í alvöru.

Ég hef nefnilega alltaf haft mikinn áhuga á þessari litlu eyju í Míkrónesíu. Hér getið þið m.a. fræðst um eyjuna og skemmst er að segja frá því að ég hef áætlað hópferð til Nárú þann 14. júlí 2014 til fagnaðar þrítugsafmæli mínu. Öllum boðið, ég skal leigja einkaþotu og kaupa snakk og ídýfu.

Súper.

|Dagga| 12:01

---

föstudagur, mars 05, 2004  

Ojjj ógeðslega asnaleg stelpa

Rétt í þessu var ég að velta því fyrir mér um hvað ég ætti að blogga. Síðan gekk stelpa inn á bókasafnið íklædd svörtum brjóstahaldara og opnum gallajakka. Djísuskræst.

Ég ákvað að vera grand á því og fór í skærbláu KRON skónum mínum í skólann, útafþví að það var svo gott veður. Þegar út var komið komst ég að því að veðrið góða var varla annað en 2°C kuldi og hálka. Mínir támjóu, fíngerðu 12.000 króna prinsessuskór höndluðu ekki málið og ákváðu að láta mig detta kylliflata; litlum börnum til mikillar ánægju. Strætó var alveg að koma... bílstjórinn spurði mig hvort það væri ekki allt í lagi. Og mér er ógeðslega illt í táslunum; þetta eru ekki beint fjallgöngubomsur!

Ég á samt varaskó niðri í skáp hjá óseljanlegu dönskubókunum og leikfimistdótinu. Einhvernveginn hefur mér samt ekki tekist að nota þá aftur, sökum þess að síðast þegar þeir voru notaðir fór ég í göngtúr í fátækrahverfi Manilaborgar. Hrædd um að koma með malaríu heim. Kannski ég sé komin með malaríu. Er ekki hægt að laga það með Gé og Té? Hah..

Og hver vill koma með á Pixies? Kim Deal rokkar feitast.

|Dagga| 13:17

---

miðvikudagur, mars 03, 2004  

SOOOOOOOOFA!

Mér finnst gott að sofa. Sérstakleg þegar ég á að fara í skólann, en áhugi fyrir hvers kyns lúlli er ekki fyrir hendi að jafnaði fyrr en kl. 2. Ég er líka alltaf syfjuð þegar ég á að læra. Ég held að þetta hafi ýmislegt að gera með það að ég borða of mikið súkkulaði. Í gær át ég hálfa plötu af rjómalíkjörssúkkulaði, eitt lítið snickers, eina djúpu og dálítið af lakkrískonfekti. Síðan píndi ég ofan í mig skyrdollu. Ekki staðgóðar máltíðir fyrir vaxandi stúlku.

Byrja í ræktinni um helgina... skyr.is og appelsínusafi er í töskunni. Búin að fá mér nóg af nammi í bili. Ég ætla ekki að skrópa neitt næstu 2 vikurnar og tekið verður á eyðslunni.

Jæja, ég skal hætta. Ég veit að ég er ekkert skemmtileg þegar ég er heilsusamleg.

Hinsvegar er lítið barn að gráta hér á bókasafni MH. Og þá erum við að tala um mánaðargamalt ungabarn. Mig langar til að fara og klappa því eða eitthvað....oh hann er svo sætur! Það er aldeilis að Sigurborg og Kristín eru orðnar líbó hvað varðar að taka gesti með sér í tíma!

Jæja, nú ætla ég að skella inn linkum. M.a. Steinunni systur minni, Margréti Ragnarsdóttur, Gunna kerfisstjóra og jááá... látum það duga í bili.

Mig langar í nýjan hárkött.

|Dagga| 11:32

---

þriðjudagur, mars 02, 2004  

Úbart.

Oft getur reynst skemmtilegt að hlýða á viðtækið sitt. Í gærkvöldi þegar ég var í makindum mínum búin að laga dýrindis ísrétt í matreiðsluvél heimilisins ásamt hjaltanum, hringdi síminn minn.

Dagbjört: Halló
Strákur: Öh... halló
D: Hver er þetta?
S: Eh, er þetta Dagmar
D: Nei, Dagbjört
S: Ó, já, öh.. Dagbjört, ert þú í Borgó?
D: Neeei, ég er í MH
S: Ó, öh já, þannig. (Skiptir um tón) JÆÆJA HVASEEGIRU?
D: ?
S: Já ertu ekki í stuði?
D: Nú skelli ég á
S: (alltíeinu eru strákarnir orðnir margir) NEIENEINEI ekki skella á, kveiktu á FM 89.00

Og þá varð mér ljóst að ég væri í beinni á útvarpsstöð Borgarholtsskóla, Útvarp SKANK. Litlu strákarnir reyndu að halda uppi samræðum við mig; ég var hin kuldalegasta en kunni ekki við að vera dónaleg í útvarpinu með því að skella á, enda naut ég þess að trampa aðeins á kúli þessara drengja. Ég var þó frekar forvitin um hvernig þeir náðu í símanúmer mitt, en þeir höfðu víst nálgast það á þessari síðu. Maður þarf að taka þetta niður.
En samtalið stóð ekki mjög lengi, en þeir náðu að ljúga því að mér að þeir væru með svona leik í gangi sem gengi út á það að í hvert sinn sem þeir segðu nafn mitt ætti einhver að hringja inn og þá væri viðkomandi búinn að vinna helgarferð fyrir fjóra í Tívolíið í Kaupmannahöfn.

Nú fer maður að velta því fyrir sér afhverju NFMH hefur ekki starfrækt útvarpsstöð um árabil, eða síðan ég var busi. Einkar hressilegt.

Eitt er þó á hreinu að Útvarp SKANK höfðar ábyggilega ekki til vina minna þeirra Baldvins og Erlings. Eins og gefur að skilja hlusta þeir aðeins og eingöngu á Létt 96,7. Mér hlaust sá heiður að vera skutlað heim af Baldvini sl. föstudagskvöld þegar árshátið Einmanafélagsins var haldin, og vá, það var fyndið að hlusta á þá:

Erlingur: Sko, þegar maður fer inn á Létt heimasíðuna, þá sér maður mynd ad þeim sem er í loftinu hverju sinni, mér finnst það geðkt kúl
Baldvin: Vá er það? Ég verð að fá mér svona tölvu í bílinn svo ég get fylgst með meðan ég er að keyra...
E: Já hehe þokkalega, en veistu, ég var um daginn næstum því búinn að vinna 96.700 krónur í leiknum, þúst, þar sem maður á að hringja inn. Og ég hringdi og það kom sónn og gaurinn bara valdi aðra línu.. ég var næstum því búinn að vinna!!
B: Sjitt ég trúi þér ekki!

.... hahahaa!

|Dagga| 11:46

---