föstudagur, júní 10, 2005  

Kaldur frontur.

Það er lítið um að vera í Mjóddinni í hádeginu á föstudögum. Stundum of lítið. Ungur maður um hálfþrítugt gengur inn í bankann og borgar gíróseðil.


Gjaldkeri í sumarafleysingum: Hundraðsextíuogsjö tilbakagjörsvovel.

(Ætlast til þess að kúnni yfirgefi básinn).

Kúnni: Já þú segir það. Hmmm. Hvað heitirðu?

Vandræðaleg þögn. Afgreiðslustúlka getur ekki ýtt ákveðið á bjölluna í von um björgun frá næsta viðskiptavini þar sem bankinn er tómur. Og allir í kaffi. Því ákveður hún að fara að ljósrita.

Kúnni: Heitirðu kannski Sumarstarfsmaður? Eheheeeee he... (Bendir á lítilfjörugan, gullsleginn skiltisstaut við glerið)

Gjaldkeri í sumarafleysingum: Nei. (ýtir ákveðið á græna takkann)

Kúnni: Er gaman að vinna hérna?

Gjaldkeri: Mhmm.

Þögn. Kúnni áttar sig

Kúnni: Er kannski bannað að höstla á vinnutíma?

Gjaldkeri: Ég myndi halda það.

Kúnni: Eh, ókei. (Yfirgefur útibúið, gjaldkera til ótvíræðs léttis).

En kemur síðan aftur og segir

En ég vil samt bara að þú vitir að ég veit að ég er glataðasti nánungi í heimi og stelpur eins og þú eru alltaf að minna mig á það! En ég heiti allavega ekki Sumarstarfsmaður!!

Ég held að ég verði að biðja um nýtt skilti. En það breytir því samt ekki að stundum mætti ég halda mér saman. Ekki samt í þessu tilviki. En, ég tala of mikið.

Ætla að fara í þagnarbindindi yfir helgi.

|Dagga| 11:36

---

sunnudagur, júní 05, 2005  

Já ég skal segja ykkur það...

Ég sem hélt að ég myndi seint detta ofaní forarpytt bloggletinnar. Vikur á vikur ofan án skrifa og ég er ömurleg. Skamm skamm.

En ef þið haldið að ég eigi eftir að gera eitthvað af viti í dag, þá skjátlast ykkur hrapallega. Af mér er nefnilega fátt að frétta. Næntúfæv í Mjóddinni og brjálæði um kvöld og helgar. Ég er orðin hálf-eirðarlaus og kann varla að njóta lífsins lengur. Er að leita að einhverju skemmtilegu lesefni. Ráðleggingar óskast! Og já - svo þarf ég að kaupa Ipod.

Skelfilegt líf.

|Dagga| 12:38

---